Uribe Butroi eskualdean eraldaketa ekosoziala sustatzea da taldearen helburu nagusia, eta horretarako hainbat lan ildo eta proiektu jarri dituzte martxan urteotan. Duela hamar urte inguru sortu zuten, esaterako, kontsumo taldea. “Eskualdeko nekazariekin eskuz esku ari gara lanean, eta lokaleko dendan bertako ekoizleen produktu ekologikoak eta bidezko merkataritzakoak saltzen ditugu”, azaldu du kideak. “Kontsumo taldean Uribe Butroi eskualdeko elikadura burujabetzaren alde egiten dugu, eta metodo sostengarriak, ekologikoak eta artisauak darabiltzaten ekoizleak balorizatzea da asmoa, haien produktuak gure bazkideengana hurbilduta”, diote webguneko aurkezpenean. 70 bat bazkide dira gaur egun taldean, eta Garoako denda asteazken arratsaldetan eta ostiral goizetan irekitzen dute. Bazkideen inplikazioa bilatuz, txanden bidez antolatzen dira dendan. “Hartu dugun gune berria alkartetxea zen garai batean, jatetxea ere bazuen. Jatetxea irekitzeko asmorik ez dugu, baina aurrera begira gure asmoa da espazioa aisialdirako ere izatea, hurbiltzen denak zerbait hartzeko aukera izatea”, gehitu du.

Bestelako proiektuak

Energia burujabetzari begira UBEK energia komunitatea sortu zuten taldetik, berriztagarrietan oinarritutako proiektu komunitario, lokal, parte-hartzaile eta irekiak bultzatzeko asmoz. Bide horretan, Goiener hasieratik bidelagun izan dutela dio Hendersonek. Eta, energiaz gain, tokiko monetarekin ere egin zuten saiakera elkartetik. “Ekhi tokiko moneta erabiltzeko proiektua bultzatu genuen. Orain Hernanin dute moneta hori eta hemen trantsizio garaian gaude”.

Hitzaldiak, liburu aurkezpenak, herritarren sentsibilizazioari begirako ekimenak, tailerrak eta bestelakoak ere antolatzen dituzte BBT elkartetik, eta orain, Garoa espazio berriak eskaintzen dizkien aukera zabalekin, horrelako gehiago egitea dute helburu. “Guk esaten dugu jende txiki askok, gauza txikiak egiten, mundua aldatu dezakeela. Oso presente dugu ideia hori gure jardunean”, amaitu du kideak.